أزول ا العيالات
كلنا كنعانيو من مشكل خسران الفلوس ,والسيطرة على الجيب مكتعنيش اننا غادي نضحيو بداكشي لكنبغيو , وهنا غادي نعطيكم ثمنية ديال النصائح لي الابحاث ثبتات النجاح ديالها باش تستهلكي بلا ما تهلكي جيب.
معمرك متقولي (لا هادي مغنشريهاش ) ,قولي( من بعد ونشريها) حيث كلمة لا غادي غير تحفزك باش تشريها كيف مكنعرفو كاملين فالممنوع دائما مرغوب ، وهكذا غتعطي فرصة لراسك باش تعرفي واش فعلا محتاجة تشري ديك الحاجة ولا.
ديري ميزانية تقديرية لداكشي ديال الكماليات لكتبغي تشري (بحال السقاطة ,مكياج ,حوايج ,ماعن …) ومعمرك متحرمي راسك ولكن ديري ميزانية ومتفوتيهاش لهاد الاشياء ,حيث فهدشي فاش كنخسرو الفلوس وهكا غتفرحي راسك بلا متهلكي جيبك.
الى كنتي من الناس لكيخرجو الفلوس يوميا فمن الاحسن انكي تبعي الانفاق ديالك كل نهار ,اما غادي تستعني بجداول لتحديد الميزانيات او تطبيقات خاصة كتعونك باش تابعي فلوسك فين كيمشيو بشكل يومي .
كيقولو البعيد عن العين بعيد عن القلب ,وهادي كتنطبق حتى على الفلوس خبيها على راسك (ماشي تعطيها لشي حد يخبيها ليك)ولكن بعديها متكونش عندك في البزطام ولا بلوكيها في الكونت ولا حيدي لاكارط كيشي.
ركزي على هدف واحد حتى توصلي ليه عاد دوزي الهدف الثاني ,مثلا بغيت منبقاش نخسر الفلوس ونجمعهم في نفس الوقت , اول حاجة غنقصو من خسران الفلوس ونتمكنو من هاد العادة ,ثم ندوزو للادخار ونبداو نجمعو الفلوس بهاد الطريقة غايكون التركيز كبر وفعال باش نوصلو لنتيجة لي بغينها .
حاولي تخطي للوجبات لغتاكلي اسبوعيا ,هكا غادي تحكمي في الميزانية ويمكن تستغلي الموضوع وتبني نظام لاكل صحي.
ديما فيما كيتزاد عدنا الفلوس اتوماتيكيا كنزيدو حتى حنا في الخسران ,ولكن هذا غلط كبير منين يتزاد عندك المدخول مغنقولش ليك خبي كلشي وحرمي راسك ,ولكن حيدي واحد النسبة صغيرة من هداك المدخول وزيدها على الفلوس لكتخسريها والباقي خبيه .
حاولي تبعدي على الاشهارات ,تفداي تخرجي معاك كارت كيشي ما امكن ودي معاك الكاش.
اخر حاجة نبغي نقولها ليكم هو انه رغم الاغراءات ل كناوجهوها في هاد العصر ديال التكنولوجيا ,ولي كتزيد تصعب الامر الا انه الى درتي واحد الهدف محدد بالارادة ديالك القوية غتوصلي ليه .شكرا ليكم ومتنساوش شاركو معايا حيلكم والمعرفة ديالكم في ما يخص هذا الموضوع باش تعم الفائدة ونستهلكو بلا منهلكو الجيب .
