أزول العيالات 👋🏻

قالو ناس زمان – سول مجرب لا تسول طبيب – 

داكشي علاش أنا خديت وعد نقلب فالحياة ديال الناس للي بارزين فالمجال ديالهم و للي بغينا يكون عندنا نجاح بحالهم و نشوف شنو هوما العادات للي عاونوهم يوصلو لداكشي للي بغاو و للي بغيت أنا و نتي .

بغيت نبدا من أول النهار للي هو الصباح. واش حتا نتي كتفيقي تالفة و دايخة و ما عندك داك النهار غير الروتين ديال القراية و الخدمة و الطياب. كتفيقي و كتنساي داكشي للي حطيتي راسك على المخدة البارح و بغيتي تحلمي بالحياة ديال الأحلام ديالك و الطموحات للي بانت ليك بعيدة ؟ 

لقيت ليك راس الخيط حيث فهاد المقال غادي نهضرو على تقنية دفتر السلك !

غادي نبداو بتحدي 31 يوم ديال براين تريسي و غادي تحتاجي غير دفتر خاوي ديال السلك و ستيلو.

كنظن أنه بحالنا بحال بزاف ديال الناس كنهضرو على أحلامنا و أهدافنا و التغيير للي بغينا غير فراس العام ولا البدية ديال العام الدراسي أولا مني كنحطو راسنا على المخدة و نغرقو فالتفكير حتا يفيقنا المنبه فالصباح. 

أحلامنا و أهدافنا و التغيير الجديد للي بغينا كيضيعو مع الأيام و الريتين و المطارق للي فالراس. 

هاد التحدي هو الحل. بغيتك كل نهار تفيقي مزيان و  تجلسي غير واحد عشرة الدقائق. تاخدي الدفتر ديال السلك و تكتبي عشرة ديال الحوايج للي بغيتي يتحققو. يقدرو يكونو أحلام ,أهداف ,تجربة جديدة بغيتي تعيشيها, شي حاجة للي نفسك فيها, شي حاجة للي قريبة ولا بعيدة, مادية أول معنوية, فيها غا نتي بوحدك و لا معا ناس اخرين.

كيف كتشوفي ما كاين أه و لا , ما كاينش صحيح أو خطأ, مستحيل أو ممكن , صعيب ولا ساهل. كاينا غير نتي دفترالسلك و الأحلام ✨.

كل نهار ضوري الصفحة و بداي فورقة جديدة عشرة ديال الحوايج بغيتيهم و ماشي ضروري يكونو جداد, تقدري تعاودي تكتبي شي حاجة كتبتيها من قبل و جات فبالك نهار اخر..

هاد التحدي غادي يحل النفس ديالك و الروح ديالك لحياة اخرى و يعطيك نفس جديد. كل نهار غا تفيقي على الأحلام و الطموحات ديالك . كل نهار عندك واحد الوقت فين كتجددي النشاط ديالك و تحيي داكشي للي نعستي و نتي كتفكري فيه.

نهار على نهار, غادي تبدا توضاح ليك الصورة و تبداي تعرفي شنو بغيتي و شنو ما بغيتيش و غادي يعمر الخزان ديال الحماس و التحفيز باش تاخدي أفكار من الدفتر و ترجعيهم أهداف و حقيقة من بعد.

راه هاد الطريقة كتبان ساهلة بزاف و لكن راه تمرين ممتع و زوين للدماغ ديالك للي مع الوقت غا يبقا يجذب ليك غير الأحلام و الأهداف و الطموحات و غا تمشي بعيد.

هذا ما كان ا العيالات نتلاقاو ف الكروب..اذا عندك اي تساؤل بخصوص هاد الموضوع ماتتردديش تشاركيه معانا و نعاونوك 😀
-اذا باقي ماداخلاش معنا ل الكروب اش كاتسناي انضمي لينا و شاركينا افكارك و تجاربك 😀 –

رايط المجموعة :  http://bit.ly/letshijouitgroup

رابط المشاركة فبرنامج بداي https://docs.google.com/forms/d/e/1FAIpQLSfrMn-pEGD4qIRsxODKInW_2ZjwRrGKCoaZFcE7Bm_ukJsqwg/viewform?usp=sf_link

رابط المشاركة فسلسلة مولات الشي 

https://docs.google.com/forms/d/e/1FAIpQLSfqpttzCwCiWg5v_guCDxtyIN4nGtMnGIw74OWgJ4sECO_vDA/viewform

رابط صفحة الأنستغرام : https://www.instagram.com/letshijouit/?hl=en

رابط قناة اليوتيوب : https://www.youtube.com/channel/UCZGfMlR8_GNIwokLwaWSIKg

كليكي على هاد المقال غادي ينفعك : افكار مشاريع منزلية
و حتى هادو غادي يعطيوك أفكار جديدة : كيفاش ديري الماركة ديالك