أزول ا العيالات 👋🏻

فهاد المقال غا نهضرو على اشارات للي ادا كانو ففترة التعرف لازم تاخدي الحذر ديالك لأنها لا تبشر بعلاقة متوازنة و صحية للي غادي تزيد الحب و الراحة فالحياة ديالك. 

الماضي ديالكم: 

إذا بدا كي عاود ليك على العلاقات السابقة ديالو في فترة التعارف ديالكم فهادي إشارة حمراء لازم تردي بالك منها. لأنه هادي دليل على يا اما هو مازال متأثر بالعلاقات السابقة للي عندو , أو أنه غادي يبدا يدير مقارنات بينك و بين النساء للي كانو معاه من قبل.

من جهة أخرى, ممنوع يسولك على الماضي ديالك أو العلاقات السابقة ففترة التعارف أو تا من بعد لأنه الماضي بقا فالماضي و نتي بنت اليوم. هاد النوع ديال الأسئلة مزعج بزاف فالبدية لأنه الماضي و العلاقات أمور جد خاصة , إذا تطرحو فالأول فهذا كي عني بيلا السيد باغي يبدأ يحاسبك أو يحكم عليك انطلاقا من تجاربك السابقة. 

البخل: 

اذا خرجتو مع بعض و بدا كي تحاسب معاك ها شنو كليتي نتي و ها شنو كليت أنا و هاشنو خاصكي تخلصي و هاشنو غادي نخلص أنا هربي عافاك بلا ما تشوفي موراك. هذا عنوان مسبق ديال حياة عامرة بالتحاسب و البخل. البخيل فالفلوس بخيل فالمشاعر و فالأحاسيس و في الدعم. بعض المرات كي تخباو مورا أنه كي يمشي بيك لشي بلاصة رخيصة أو كي قول ليك يالاه غير نتمشاو . البدايات مهمة بزاف فإذا بداو هاكا راه انذار أحمر.

الانتقاذ:

اذا بدا الشخص كي دير تعاليق على حياتك , خدمتك, لبسك , ماكياجك, جسمك, صحابك, عائلتك أو طريقة الأكل ديالك فهادي حاجة مرفوضة تماما. نتي محتاجة شريك للي يبغيك و يقدرك و يكون ليك دعم و سند و يكون أول واحد يمدحك و يصفق ليك على الصغيرة و الكبيرة. أي شخص يضرك التعليق ديالو و يجرح المشاعر ديالك فهو شخص ما مناسبش ليك.

مطر المشاعر:

هادي يمكن هيا أهم حاجة لازم تردي ليها البال حيث كتبان ايجابية في حين أنها رأس الشر بعينيه.

الشخص للي من الأول كي بقا يقول ليك صباح و ليل شحال نتي زوينة و شحال بدلتي ليه حياتو و عمرتي ليه قلبو, الشخص للي كي صيفط ليك ميساج كل عشرة الدقائق و كي يفيض بالحب و الغرام للي ما عرفتيش أصلا امتا بدا فهادا شخص لازم ديري معاه الحيطة و الحذر. 

اذا كان صادق فهضرتو فهادا انسان عندو تعلق مرضي و احتياج عاطفي كبير للي غادي يثقل عليك بزاف لأنه غادي يبقا ينتظر منك المستحيل باش ترضيه و تعمري الفراغ للي عندو. أما إذا كان غير صادق  و هادي هي الأغلبية فراه هذا فخ كي يستعملو باش يعمر الوقت ديالك كامل و يخليك كتفكري فيه غير هو. كي خلي هادشي عندك ادمان عليه و على الحب للي ماشي حقيقي باش تتعلقي بيه و يقدر من بعد يتحكم فيك كيف بغا. ويااااك طيحي ففخ الحب و الكلام المعسول فبدايات التعارف.

هذا ما كان ا العيالات نتلاقاو ف الكروب..اذا عندك اي تساؤل بخصوص
هاد الموضوع ماتتردديش تشاركيه معانا و نعاونوك 😀
-اذا باقي ماداخلاش معنا ل الكروب اش كاتسناي انضمي لينا و شاركينا افكارك و تجاربك 😀 –

رابط المجموعة :  http://bit.ly/letshijouitgroup

رابط المشاركة فبرنامج بداي:  https://docs.google.com/forms/d/e/1FAIpQLSfrMn-pEGD4qIRsxODKInW_2ZjwRrGKCoaZFcE7Bm_ukJsqwg/viewform?usp=sf_link

رابط المشاركة فسلسلة مولات الشي :

https://docs.google.com/forms/d/e/1FAIpQLSfqpttzCwCiWg5v_guCDxtyIN4nGtMnGIw74OWgJ4sECO_vDA/viewform

رابط صفحة الأنستغرام : https://www.instagram.com/letshijouit/?hl=en

رابط قناة اليوتيوب : https://www.youtube.com/channel/UCZGfMlR8_GNIwokLwaWSIKg