أزول ا العيالات 👋🏻
قالو اللقاء الأول عليه تعول و ما كدبوش. الانطباع الأول للي كناخدوه على الشخص صعيب يتبدل من بعد خصوصا أنه كيحدد كيفاش تطور العلاقة غادي يكون من بعد. داكشي علاش فهاد المقال غا نهضرو على قواعد لازم نحتارموها باش نعبرو على راسنا بطريقة لائقة.
اللباس ديالنا للقاء الأول ضروري بزاف لأنه كي عبر على احترامنا لنفسنا و تقديرنا للجلسة للي غا نديريها مع الشخص للي معانا.
من الأحسن نبعدو على الألوان الفاقعة و نختارو لباس هادئ بألوان دافئة و متناسقة و ضروري هنا تأكد على ضرورة اختيار لباس للي ما يكونش ضيق بزاف و قصير. وصايا خبراء الايتيكات كي قولو لازم الكسوة أو الصاية ما تكونش فوق الركبة و لو ففصل الصيف.
نختارو لباس للي ماشي رسمي بزاف و لكن ما نرتاحوش بزاف و نجيو لابسات بحالا ما خدينا تا ربع ساعة باش نحضرو, لأنه هادشي غا يخللي الشخص الاخر يحس أنك ما واخداهش بجدية.
ماكياج اللقاء الأول لازم يكون هادئ يعني ما قل و دل :
حواجب ممشوطة,كريم أساس خفيف, ماسكارا, أحمر خدود و عكر بسيط ديال كل نهار كافيين باش يبينو ملامح وجهنا الجميلة للشخص للي قدامنا. لأنه ادا كثرنا من الماكياج غا توللي هادي هي القاعدة الأساسية و النهار للي غتخرجي بلا ماكياج ثقيل غا تباني بحالا مريضة. ثيقي فجمالك الطبيعي و اعتمدي ماكياج بسيط من أجل التعارف.
ماشي ضروري تختاري مكان اللقاء بنفسك و لكن ضروري أنك تحددي أنه المكان يكون فيه جو عائلي و محترم. يكون مكان عام يعني فيه ناس اخرين ماشي غير بوحدكم باش يكون عندك واحد النوع ديال الحماية كمرأة في حالة صدر منو تصرف أو كلمة غير محترمة. و ضروري يكون مكان هادئ ما فيهش الحركة و الصداع بزاف باش تقدرو تهضرو و تسمعو لبعضكم براحة و سهولة.
كيف قلنا من قبل الانطباع الأول مهم جدا باش تبيني أنك انسانة محترمة, جدية و لازم يتضرب ليك حساب.
خرجي فوقت مناسب باش توصلي قبل الموعد المحدد بخمسة دقائق. ما عندها تا معنى توصلي معطلة بأكثر من ربع ساعة أو توصلي فالوقت ولكن عرقانة و عطشانة و معصبة من المركوب. ديري حسابك بيلا لازم توصلي نفسيتك مرتاحة و ريحتك زوينة باش تعطي انطباع أنك كتحتارمي الالتزامات و الوعود ديالك.
ما عمر الناس كايخرجو من دارهم فيهم الجوع إذا غايتلاقاو شي واحد، علاش فنظرك ؟
أولا باش ايلا ما لقاوش شي حاجة للي غادي تعجبهم ما يضرهمش الحال ولا يحسو بالعيا أو يهبط ليهم ضغط الدم. ثاني حاجة باش ما يكونش بالهم مع الأكل و ما يركزوش مزيان على الهضرة للي كيقول الشخص للي قدامهم و أخيرا راهم ديما كيطلبو غير شي حاجة خفيفة و ناشفة للي ياكلوها بلباقة و ما تقطرش على الملابس ديالهم. تفكري ناس زمان قالو : جوعي فكرشي و عنايتي فراسي.
هذا ما كان ا العيالات نتلاقاو ف الكروب..اذا عندك اي تساؤل بخصوص
هاد الموضوع ماتتردديش تشاركيه معانا و نعاونوك 😀
-اذا باقي ماداخلاش معنا ل الكروب اش كاتسناي انضمي لينا و شاركينا افكارك و تجاربك 😀 –
رايط المجموعة : http://bit.ly/letshijouitgroup
رابط المشاركة فبرنامج بداي https://docs.google.com/forms/d/e/1FAIpQLSfrMn-pEGD4qIRsxODKInW_2ZjwRrGKCoaZFcE7Bm_ukJsqwg/viewform?usp=sf_link
رابط المشاركة فسلسلة مولات الشي
https://docs.google.com/forms/d/e/1FAIpQLSfqpttzCwCiWg5v_guCDxtyIN4nGtMnGIw74OWgJ4sECO_vDA/viewform
رابط صفحة الأنستغرام : https://www.instagram.com/letshijouit/?hl=en
رابط قناة اليوتيوب : https://www.youtube.com/channel/UCZGfMlR8_GNIwokLwaWSIKg